Zurück zur Übersicht

337 Quellen in diesem Teilcorpus. Sie sehen die Quelle 188.

• ««
• «
• »
• »»

Elsass 1, Nr. 180

1335 April 11

Jakob Schlifer, Priester von Neuweiler, bekundet, dass er einen Ewigzins in Form zweier Hennen, die ihm die Juden von Neuweiler jährlich zu St. Martin von ihrer Synagoge her zu geben schuldig waren, an Klaus, den Krämer von Neuweiler, dessen Frau Junte und deren Erben verkauft hat.

Ich, Iacop Schlifer, ein priester von Nuwilr, thün künt allen den, die dissen brieff sehent oder hoͤrent lesen, das ich fur mich unde myn erben zu kouffe habe geben Clawese, dem cremere von Nuwilr, und Iuntten, siner elichen frouwen, und iren erben zwey hunre geltes, zwo hennen, die mir die iuden von Nuwilr alle ior gebent und schuldig worent zú gebende zuͦ sancte Martins naht von ire schuͦllen, die do gelegen ist zuͦ Nuwilr in der stat gegen Harwers huse an Reinsute. Und sullent die selben zwei gemechede die zwey húnre geltes von den selben iuden und von iren erben ewekliche nemen iergliches, sie und ouch ire erben allezyt zuͦ sancte Martines naht. Und sol man ouch wissen, das die selben Clauwes und Iuntte mir die zwey hunre geltes guͦtliche vergelten hant. Und globe ouch fur mich und fur myne erben, das ich noch min erben sie zwei gemechede noch ire erben nyemer menren insol an denn zweyn selben hunren geltes. Und dis globe ich fur mich und fur myn erben stette zuͦ habende one alle geverde. Und des zuͦ eime urkunde so habe ich, Iacob Schlifer, gebetten den erbern man, hern Bernhartten, unszn lupriester, wan ich nit selber ingesigel inhabe, sin ingesigel an dissen brieff hencken, mich und myne erben zuͦ besagende. Und ich, Bernhart, ein lupriester zu Nuwilre, durch bette des vorgenantenes [!] hern Iacobes Schlifer, so habe ich myn ingesigel an dissen brieff gehencket, in und sin erben zú besagende dirre brieff. Wart geben an dem zinstage in der karwuchen in dem ior, do man zalte von gottes geburtte drutzehen hundert iar und funff und drissig iar.

Überlieferung:

• Metz, Essai, Tl. 2 (2008), S. 151, Anm. 237.
• Haarscher, Juifs (1997), S. 38;
• Mentgen, Studien (1995), S. 47.

(gem.) / Letzte Bearbeitung: 05.05.2017

Zurück zur Übersicht