Zurück zur Übersicht

337 Quellen in diesem Teilcorpus. Sie sehen die Quelle 186.

• ««
• «
• »
• »»

Elsass 1, Nr. 178

1335 März 10, Buchsweiler

Nach einer Güterteilung im Hause Lichtenberg werden von Konrad von Kirkel, Domkustos zu Straßburg, Heinrich von Finstingen und Hanemann von Lichtenberg auch die jeweils zu übernehmenden Schulden zwischen Ludemann (Ludwig III., d. Ä.) von Lichtenberg einerseits und seinen Vettern, den Brüdern Johann, Simund und Ludwig von Lichtenberg, andererseits aufgeteilt. Unter den Gläubigern befinden sich auch Juden von Straßburg und Zabern sowie der Jude Sibelin.

Allen den si kunt, di disen brief sehent oder hoͤrent lesen, daz wir, Cuͦnrat von Kirkel, custer zuͦ Strazburg, Heinrich herre von Vinstingen unde Haneman herre zuͦ Liehtenberg, uns an hant genomen uszerihtende unde zuͦ sprechende von Ludemans, Iohans, Symunds unde Ludwigs, herren zuͦ Liehtenberg wegen, als der anlas briefe stat, der dar úber gemaht ist umbe die schulde, die sú zuͦ beden siten schuldig sint, als hie nach geschriben stat. Sprechent also, waz schulden Ludeman zuͦ sime teil von Iohans, Symon unde Ludwig zum andern teil gevallen ist, da sol Ludeman der vorgenante sin teil gelten zuͦ den ziln, als men sú danne gelten sol, also were ez, dez der vorgenante gebruͦdere Iohans, Symund oder Ludwig oder ire lúte denheinen schaden littent, da sú sich vuͦr den vorgenanten Ludeman verbunden hant, den sol er denselben gebruͦderen unde irn lúten usrihten unde ledig unde los machen ane alle geverde. Glicher wis súllent die vorgenanten gebruͦdere die schulde, die sú angevallen ist, oͧch sunder gelten oͧch zu den ziln, als men sú gelten sol. Unde wo der vorgenante Ludeman oder sin lúte vúr die selben gebruͦdere haft sint, da súllent sú in unde sin lúte oͧch lidig unde los machen unde von schaden ziehen ane geverde. Von welcher siten daz nut wurde stete gehalten, also da vor geschriben stat, da het der oder die maht, an dem oder an den danne gebrochen ist, in, ir lúte und ir guͦt drumbe zuͦ bekumbernde, ze pfendende unde anzegrifende ane zorn, mit gerihte oder ane gerihte, bitz an die stunt, daz sú erlediget werdent umbe den schaden, den sú oder ir lúte oder drube (1) daz hoͧbz guͦt gelitten hettent, als da vor geschriben stat. Unde sol den oder die do vor nút schirmen dehein lantfride, friheit, gewonheit noch denhein gerihte, geistliches noch weltliches, noch ufsatzunge der stette oder dez landes. Und hant diz globet zuͦ bedensiten bi triwen an eides stat stete zuͦ habende ane alle geverde. Unde ist diz die schulde, die der vorgenante Ludeman schuldig ist: Zuͦ dem ersten hern Heinrich von Múlnheim funftehalp hundert pfunt. Item hern Wengelin funfzig pfunt. Item Dielman Schutzen zwenzig pfunt. Item Goͤtzeman von Lupfenstein drissig pfunt. Item hern Fritscheman von Telingen vier unde funfzig pfunt. Item Dietherich Kammerer funfzig pfunt. Item Heinrich von Schalkendorp zehen pfunt. Item dem von Widen sehs pfunt. Item Synerlin von Zabern drissig pfunt. Item Lutzeman von Lampartheim eilf pfunt. Item Uͦlrich Ritter funftehalp pfunt. Item Voͤlgwin von Hagenowe zehen pfunt. Item Merkelin von Cropfesberg ahtzig pfunt. Item hern Claus Jungzorn fúnfe unde funfzig pfunt. Item Claus Mosunge zwei hundert phunt eins unde zwentzig phunde minre. Item hern Albreht Roͤder zwelfe phunt. Item der stat zuͦ Strazburg hundert phunt. Item Ieckeline, dem iuden von Strazburg, drittehalp hundert phunt drier phunde minre. Item Iacobe, dem iuden von Zabern, ahtzig phunt unde sehszehen pfunt von Frideriches wegen von Uͦtwilre. Item Iohan Hechit funfe unde zwentzig phunt uf rechenunge. Item Peterman von Vinstingen sehstehalp phunt. So ist diz die schulde, die die vorgenanten gebruͦdere schuldig sint: Zuͦ dem ersten funfhundert phunt unde zwentzig phunt, die sie gemaht hant, die súllent sie selber gelten. Item Fritschen von Uͦtwilre drissig phunt. Item Gerhart Harnesch sehszig pfunt uf rechenunge. Item hern Dietherich von Bilwisheim vier unde zwentzig phunt. Item Burkart von Burne zwentzig phunt. Item Loͤrkin nún phunt. Item eime iuden zuͦ Zabern ane eins zwentzig phunt. Item hern Hartunge von Wangen zehen pfunt. Item schultheisse Muͤlich siben pfunt. Item Claus Snider funfzehen phunt. Item hern Anshelme von Berwerstein nún phunt. Item Raissen [?] von Hagenowe zwei phunt. Item Mettelin von Surburg funfe und drissig phunt. Item Hartmannes bruͦder von Wissenburg sehs phunt. Item Henselin von Húpfensheim fúnf phunt. Item der stat zuͦ Strazburg drissig phunt. Item Cuͦnrat dem schriber sehs phunt. Item Billunge von Reinicheim zwei unde funfzig phunt. Item hern Cuͦnemanne Voͧgt zwei hundert phunt. Item der stat von Strazburg hundert phunt. Item Kogen, dem iuden von Strazburg, sehs phunt unde dirtehalp hundert phunt. Item Sibelin dem iuden ahtzig phunt uf rechenunge. Item Iohan Hechet fúnfe unde zwentzig phunt uf rechenunge. Item Peterman von Vinstingen sehstehalp phunt. Dise vorgeschriben zwo schulden sint alles Strazburger phenninge. Item umbe die schulde zuͦ Hagenowe unde zu Sarburg, die sú schuldig sint, und die schulde, die sú Friederich Bockes erben, Ludwig von Croswilre, Iohan von Tan, Eberlin von Waltenheim unde hern Iohan von Moͧnburnen [schuldig sint], die ist bliben ungeteilt. Unde súllenz gemeine gelten, als reht ist. Were oͧch denheine schulde vergessen, da sol in zuͦ beden siten ir reht behalten sin. Wir hant oͧch behalten von irs varnden guͦtes wegen, daz wir sprechent, so wir wollent, wanne wir zuͦ disem male nút drumbe gsprochen hant. Alles daz da vorgeschriben stat, han wir gesprochen mit ir beder wille, als sú ez [!] zuͦ beden siten an uns komen sint. Und dez zuͦ eim urkúnde han wir unsere ingesigele an disen brief gehencket. Wir oͧch, Ludeman, Iohans, Symon unde Ludeman, herre zuͦ Liehtenberg, die vorgenanten, veriehent, daz unser guͦt wille ist, allez daz die vorgenanten herren, her Cuͦnrat von Kirkel, her Heinrich von Vinstingen unde her Haneman gesprochen hant in alle wis, als da vor geschriben stat, unde globent ez bi trúwen an eides stat stete zehabende ane alle geverde. Und dez zuͦ eime urkúnde han wir, Ludwig, Iohans unde Symund, die vorgenanten herren zuͦ Liehtenberg, unsere ingesigele zuͦ der vorgenanten herren ingesigele gehencket an disen brief. Wir oͧch, Iohans unde Symon, die vorgenanten gebruͦdere, globent vúr unsern bruͦder Ludwigen, den vorgenanten, under unsern vorgenanten ingesigeln. Diz beschah unde wart dirre brief geben zuͦ Buhswilre an dem fritage nach der grossen vastnaht, da man zalte von gotz gebúrte drúzehen hundert iar unde in dem fúnfe und drissigosten iare.

Rückvermerk:

von hern Ludewiges schulde (14. Jh.)

(1) Statt drube könnte es umbe heißen, doch ergäben sich auch dann Verständnisschwierigkeiten. Eventuell hat der Schreiber versehentlich ein Wort ausgelassen.

Überlieferung:

• Quellen zur Geschichte der Juden im STA Darmstadt, Nr. 47, S. 16;
• Lichtenberger Urkunden 1, Nr. 421, S. 130 f.;
• Regesten zu einer Territorialgeschichte, Nr. 202 (ohne Seitenzählung);
• Clemm, Teilung (1942), Nr. 3, S. 63 f.

• Mentgen, Studien (1995), S. 470;
• Haarscher, Juifs (1997), S. 37;
• Clemm, Teilung (1942), S. 59.

(gem.) / Letzte Bearbeitung: 05.05.2017

Zurück zur Übersicht